Þuríður Jóna Árnadóttir (1920-2012), rithöfundur

Þuríður Jóna Árnadóttir (1920-2012), rithöfundur

Þuríður Jóna Árnadóttir fæddist í Miðdölum, Dalasýslu, 8. september 1920. Hún lést á Dvalarheimilinu Grund 14. desember 2012. Foreldrar hennar voru Sigurjóna Jónsdóttir frá Arnarstapa, Snæfellsnesi (1894-1959) og Árni Jónasson ullarmatsmaður frá Stóra-Vatnshorni í Haukadal (1892-1968).

Þuríður var einkabarn foreldra sinna og ólst upp í foreldrahúsum í Skriðukoti í Haukadal. Fluttist hún þaðan með foreldrum sínum til Reykjavíkur árið 1934. Þuríður giftist Ingólfi Jónssyni, frá Stöðvarfirði, (1908-1998) árið 1941. Þau skildu. Þuríður og Ingólfur eignuðust eina dóttur, Steinunni, (f. 1943). Árið 1958 giftist Þuríður honum Einari Alberti Magnússyni leigubifreiðastjóra frá Leirubakka í Landsveit (1917-1992). Þuríður og Einar eignuðust Árna Kristin, (f. 1959).

„Þuríður tók barna- og gagnfræðaskólapróf í Reykjavík. Síðari á ævinni stundaði hún nám við öldungadeild Menntaskólans við Hamrahlíð. Hún vann lengi við verslunarstörf í Reykjavík, m.a. hjá kvenfataverslununum Ninon og Feldinum. Ljósmyndun var Þuríði mjög hugleikin og starfaði hún m.a. hjá ljósmyndastofu Vigfúsar Sigurgeirssonar og ljósmyndastofu Lofts. Á sjötta áratugnum fór Þuríður til Bandaríkjanna og starfaði þar við ýmis þjónustustörf. Eftir að heim kom starfaði hún í mörg ár hjá Sambandi íslenskra samvinnufélaga við verslunarstörf og kenndi þar m.a. á Singer-saumavélar eftir að hafa sótt nokkurra mánaða námskeið þar að lútandi í London.

Þuríður stundaði ritstörf, skrifaði sögur og ljóð. Auk þess sem hún tók fjölmörg viðtöl við alþýðuhetjur víða um land sem birtust í Lesbók Morgunblaðsins undir stjórn Gísla Sigurðssonar ritstjóra. Þuríður var vel hagmælt og ættingjar hennar gáfu út ljóðasafn hennar „Hvaðan og hvert“ á nýræðisafmæli hennar 2010. Þuríður og Einar bjuggu í Reykjavík, lengst af á Háaleitisbraut og síðar í Mávahlíð. Eftir lát Einars bjó Þuríður áfram í Mávahlíð en flutti á Dvalarheimilið Grund haustið 2011.“

Heimild: Morgunblaðið 21. desember 2012 https://www.mbl.is/greinasafn/grein/1448649/

Þann 4. apríl 2016 barst um hendur Hákons Arnars Árnasonar ýmislegt efni úr fórum ömmu hans Þuríðar Jónu Árnadóttur (1920-2012).